غەزاڵی خۆشخەرامی من، کە توڕڕە ئینتیشار ئەکا
هەزار شێری سەفشکەن¹ بە ڕشتەیێ شکار ئەکا
کە تیری غەمزە تێژ ئەکا، لە جەرگ و سینە کار ئەکا
کە قامەتی² بەدەر ئەخا، قیامەت ئاشکار ئەکا
چ قامەتێ؟ بە ڕاستی لە سەروی جۆیبار³ ئەکا
فیدایی دڵبەرێ ئەبم کە عەینی دڵڕوبایییە⁴
غوڵامی سەروەرێ ئەبم کە فەخری پادشایییە
کە ڕۆژی هیجری⁵ ماتەمە و شەوی ویساڵی⁶ شایییە
کە سەد هەزاری وەک منی بە جان و دڵ فیدایییە
نە من کە نەقدی جان و مڵک لەڕێی ئەوا نیسار⁷ ئەکا
لە گوڵشەنی نوبووەتا گوڵێکی نەودەمیدەیە⁸
لە قولزومی⁹ ڕیسالەتا دوڕێکی کەسنەدیدەیە
لە بورجی چەرخی عیززەتا مەهێکی¹⁰ بەرگوزیدەیە¹¹
هەزار شاهـ و حاکمی غوڵامی زەڕخەریدەیە¹²
کەسێکە موعجیزەی ئەسەر لە وردەبەرد و دار ئەکا
گەدایی بارەگاهی ئەو ئەگەر ئەمیر، ئەگەر وەزیر
فیدایی عیزز و جاهی ئەو ئەگەر غەنی، ئەگەر فەقیر
مەپرسە خەرقی عادەتی¹³ شەهەنشەهی فەلەک سەریر
ئەگەر لە فەیزی ئەو نەبێ دوو هۆقە¹⁴ جۆ و یەک چتیر¹⁵
چلۆن لە ڕۆژی خەندەقا کیفایەتی هەزار ئەکا
موتیعی ئەمر و نەهی ئەو ملووکی سەرکەش و بزێو
ئەسیری قەهر و لوتفی ئەو سیباع و وەحشی دەشت و کێو
نیگاری دڵشکاری من لە هەر فەراز¹⁶ و هەر نشێو
کە پەردە لابدا لە ڕوو بە بۆیی زوڵف و خەدد¹⁷ و لێو
لە ڕایحەی¹⁸ بەهەشت ئەکا، لە نوور ئەکا، لە نار ئەکا
لە ئەووەڵ و لە ئاخرا مەداری¹⁹ ئەنبیایە ئەو
لە باتین و لە زاهیرا حەبیبی کیبریایە ئەو²⁰
کە چونکە لای خودا قسەی بەڕاستی ڕەوایە ئەو
دە موژدە بێ لە ئوممەتی کە گەورەیێکی وایە ئەو
لە ڕۆژی مەحشەرا تکای هەموو گوناهکار ئەکا
پەیەممەرێ کە باعیسی وجوود و خەلقی عالەمە²¹
کە تاقەسواری عەرسەیی شەفاعەتە و موسەلـلەمە²²
کە زام و هیجر و میحنەتی سروور و وەسڵ و مەرهەمە
لە هەفتخوانی سینەدا موژەی²³ خەدەنگی²⁴ ڕۆستەمە
لە فەتحی خەیبەری دڵا برۆی لە ذوالفَقار²⁵ ئەکا
شەها بە غەیرەتت قەسەم دەمێکە دیلە ئوممەتت
بە دەس عەدووی²⁶ دینەوە عەجەب زەلیلە ئوممەتت
لە خەستەخانەیی غەما وەها عەلیلە ئوممەتت
بە چیهرە زەردییا ئەڵێی دوچاری سیلە ئوممەتت
دەوایی ڕەحم و لوتفی تۆ هەمیشە ئینتیزار ئەکا
خۆش ئەو دەمەی کە ڕۆژ و شەو تەواف ئەکا ڕەواقی تۆ
خۆش ئەو سەرەی کە کەوتبێ لە کووچە و سوقاقی²⁷ تۆ
بە تیکە تیکە بێ دڵێ کە نەیبێ ئیشتیاقی تۆ
حەیاتی من ویساڵی تۆ، مەماتی من فیراقی تۆ
بەڵێ پەری خەیاڵی تۆ عیلاجی شێت و هار ئەکا
دەمێکە چاوەڕێیەتی گیان و دڵ ویساڵی تۆ
ئومێد ئەکا کە دەرکەوێ لە پڕ مەهی جەماڵی تۆ

_________________

(1) سەفشكەن: پۆل شكێن، ئازا، هەروەك پیرەمێرد دەڵێت:
سەیری ئەمانە کەن، هەمووی کوردی سەفشکەن
گیانیان پێشکەش ئەکرد و ئەیانوت بژی وەتەن
(2) غەمزە: جووڵەی چاو و برۆ وەك نازكردن.
(3) قامەت: قەد و باڵا.
(4) جۆیبار: جۆگەلە، گوێ جۆگە.
(5) دڵڕوبا: بەردێكی جوانی سافە، وەك خشڵ بەكاردێت، ئافرەتان خۆیانی پێ دەڕازێننەوە.
(6) هیجر: دابڕان. ویساڵ: بەیەكگەیشتن.
(7) نيسار دەكات: قوربان دەكات، لەپێناویدا لەناوی دەبات.
(8) نەودەمیدە: تازەپێگەیشتوو
(9) قولزوم: دەریای پڕ ئاو.
(10) مەهـ: مانگ.
(11) بەرگوزیدە: خۆشەویست، ئازیز.
(12) خەریدە: كچی پاكیزە. مروراریەك كون نەكرابێت.
(13) خەرقی عادەت: شتێك لە عادەت بچێتە دەرەوە، وەكو كەرامات و موعجیزە.
(14) هۆقە: پێوەرێكی كێشانە.
(15) چتیر: بێچووی بزن لە تەمەنی یەک ساڵەوە تا دوو ساڵە.
(16) فەراز: بەرزی و بڵندی.
(17) خەد: ڕوومەت، گوڵمە.
(18) ڕایحە: بۆن.
(19) مەدار: مەداری هەر شتێك ناوەند و خولگەكەیەتی، واتە لەسەر ئەو وەستاوە.
(20)حەبیبی كیبریا: خۆشەویستی خوای گەورە.
(21) هۆكاری درووستكردنی جیهان دەگێڕنەوە بۆ فەرموودەیەك كە خودای گەورە فەرموویەتی: لەبەر موحەممەد نەبا گەردوونم درووست نەدەكرد. بەڵام فەرموودەیەكی هەڵبەستراوە، فەرموودەیەكی تریش هەیە گوایە بە ئادەمی فەرمووە: لەبەر موحەممەد دنیام درووست كردووە، ئەویش فەرموودەیەكی لاوازە و كاری پێ ناكرێت.
(22) تاكە سوارچاكی شەفاعەتكردنە لە ساحەی قیامەتدا.
(23) موژە: برژانگ.
(24) خەدەنگ: تیر.
(25) ذولفەقار: شمشێرەكەی پێشەوا عەلی كوڕی ئەبوتایبە(

(26) عەدو: دووژمن.

(27) سوقاق: كۆڵان.